Кызылга «Тайбың субурганын» ажыглалга киирген
Бөгүн, август 31-де, тыва чоннуң ынак, ыдыктыг черлериниң бирээзи Дөгээ дааның эдээнге Улуг Геше Лобсанг Тхуптенниң чагыы-биле Башкының ыдыктыг «Тайбың субурганы» ажыглалга киирген.
Дээди Хуралдың Даргазы Каң-оол Давааның даалгазы-биле тыва парламентиниң мурнундан Аяна Монгуш биле Юрий Кара-оол – комитеттер даргалары байыр чедирип, чүве чугаалааннар.
Олар Лобсанг Тхуптен башкы Тываның улуг шажын ажылдакчызы чораан деп демдеглээннер. «Бистиң республикавысты чуртсуна бергеш, ооң шажынчы хөгжүлдезинге улуг рольду ойнаан. Бөгүн ажыдып турарывыс «Тайбың субурганы» Лобсанг Тхуптен башкының тыва чонунга буянныг ажылының уламчызы болур. Ол бодунуң буянныг ажыл-үүлезин моон соңгаар ыдыктыг бо Субурган дузазы-биле уламчылаар. Башкының чаа Өргээзи республиканың чурттакчыларынга, Кызылдың аалчыларынга, хөй санныг чүдүкчүлерге бүзүрелди, сагыш-сеткил оожургалын эккеп, чаагай үүлени көргүзер дээрзинге бүзүреливис улуг» - деп, Аяна Монгуш чугаалаан.
Депутаттар Субурганны арыг, ажык сеткилдиг, буянныг чаңгыс чер чурттугларының болгаш төвүт башкыларның чаңгыс деми-биле тудуп кылганын база демдеглээннер. «Ол кайгамчык күштерниң үнер дөзү, уян сеткилдиг кижи амытанның камгалакчызы, бистиң шуптувусту өжээн-хомудалдан, адааргак сеткилден, бужар бак чүүлдерден арыглап чоруур езулуг-ла амылыг, ыдыктыг Бурган өргээзи болур» - деп, Юрий Кара-оол чугаалаан.
Тайбың субурганының ажыдыышкынынга шажынчылардан аңгыда, күүсекчи эрге-чагырга органнарының төлээлери база киришкен. Субурган тудуунга эки киришкен төвүт лама-башкыларга Дээди Хуралдың шаңналдары – Хүндүткел бижиктерни, Өөрүп четтириишкиннерни тывыскан.