ТР-ниң Дээди Хуралының Даргазы К.Т. Даваа хүреш маргылдаазының хүндүлүг аалчызы болган
Бөгүн, майның 1-де, республиканың Владимир Биче-оол аттыг стадионунга Тываның хөгжүм-шии театрының шаңналы дээш 98 мөгениң хүрежи болуп эрткен.
Театржыткан спортчу оюнну ТАР-ның тургустунганындан бээр 100 чыл оюнга тураскааткан болгаш, ону «Сүзүүм – Театр, Күчүм – Хүреш, Чүрээм - Тыва» деп чараш ат-биле эрттирген.
Хүреш болгаш театржыткан оюн-тоглаа ТАР-ның 100 чылы-биле холбашкан болганындан, дөрт кол шаңналдың ийизин Буян-Бадыргы биле Ажыкай нояннарның салгалдары боттарынга алганнар. Шүүлген мөгеге – Баасан Баткарга шаңналды хүрештиң тайылбырлакчы, улуг спортчу Владимир Сумакинович Биче-оолдуң ажы-төлү тывыскан. Чүге дизе, стадионга ооң адын ТР-ниң Баштыңы В.Т. Ховалыг бо хонуктарда тывыскан.
Бирден дөртке чедир шаңналдыг черже кирген мөгелерге аъттар сертификаттарын тывыскан. Беш-сеске арткан мөгелерге шээр малдар берген. Өске-даа тускай шаңналдар элбек болган.
ТР-ниң Баштыңы В.Т. Ховалыг биле ТР-ниң Дээди Хуралының (парламентизиниң) Даргазы К.Т. Даваа маргылдааның хүндүлүг аалчылары болганнар.