ТР-ниң Дээди Хуралының Даргазы Кан-оол Давааның Шагаа-2022-биле чонга байыр чедириишкини
Хүндүлүг чонум!
Авыралдыг ава Тывавыска шаг-төөгүден бээр аймак-төрел болуп алгаш, омак-хөглүг демдеглеп чораанывыс өндүр улуг Шагаа байырлалын таварыштыр Силер-биле чолукшуп, ал-бодуңарга кадыкшылды, аас-кежикти, аал-ораныңарга амыр-тайбың амыдыралды, ажыл-ижиңерге чедиишкиннерни Тыва Республиканың Дээди Хуралының (парламентизиниң) база ал-бодумнуң өмүнээмден күзээрин чөпшээреп көрүңер!
Үнүп келген суг олуттуг кара Пар чылында ак-көк Тыва чуртувуска эки болуушкуннар элбек, а думаа-ханаа өршээлдиг-ле болзун деп Силерниң-биле кады йөрээп ор мен! Чараш байырлалывысты сагыш-сеткиливис сергек, хей-аъдывыс бедик уткуп, демдеглеп эрттирээли.
2022 чыл – Россияның чоннарының культурлуг салгалының чылы. Бурунгу тыва чоннуң культурлуг салгалы кончуг улуг, ууттунмас байлак. Ону чурттуң, а харын-даа делегейниң чоннарынга көргүзер, таныштырар ажылдарны күштелдирери чугула.
Республиканың бурунгаар хөгжүлдези дээш бир демниг ажылывыс моон-даа соңгаар уламчылаарынга идегеп, чаа Пар чылында чаагай күзелдериңер ыяап-ла бүдер болурун, кадык чаагай чорууруңарны күзедим!
Хүндүткел-биле,
Тыва Республиканың Дээди Хуралының (парламентизиниң) Даргазы К. Даваа