Улустуң чурукчузу Начын Шалыктың ээлчеглиг делгелгези
Дүүн, май 24-те, Тываның үндезин культура болгаш ус ажылдар төвүнге Тываның улустуң чурукчузу, Моолдуң культуразының хүндүлүг ажылдакчызы Начын Кара-оолович Шалыктың сүлде демдектерге болгаш таңмаларга тураскааткан делгелгезиниң ажыдыышкыны болуп эрткен.
Мастер ону ТАР-ның 100 чыл оюнга, Тыва театрның 80 чылынга, бодунуң 55 харлаанынга тураскааткан. Чурукчу чыылган чонга делгелгени хөй санныг эш-өөрүнүң болгаш көрүкчүлериниң саналы, дилээ-биле организастап турарын чугаалаан. Делгеттинген ажылдар – үр чылдарның чогаадыкчы ажылдарының түңнели.
ТР-ниң Дээди Хуралының Даргазы Кан-оол Тимурович Давааның даалгазы-биле парламентиниң чылыг-чымчак сөстерлиг байыр чедириишкинин депутат Шолбан Идамчапович Кыргыс номчуп таныштыргаш, белек-селекти сунган. «Республикада үре-түңнелдиг ажылдап чоруур чурукчуларның бирээзи Силер. Ховар ажылдарыңар улуг делгелгези 2 чыл бурунгаар эрткен. Бөгүнгү делгелгеңер-биле бисти база катап өөртүп тур силер.
Шилиттинген ажылдарыңарның делгелгези бедик деңнелге эртер дээрзинде чигзиниг чок. Чүге дизе, Силер уран чурулганың мастери силер. Чүгле шак ындыг салым-чаяанныг кижи 80 ажыг шиилерге, он-он номнарга уран каасталгаларны кылып шыдаар. Ажылдарыңар дээжилери чүгле Тываның эвес, а Россияның улуг-биче хоорайларының театрларының шиилерин каастап турар.
«Хунан-Кара» деп тыва тоолга чурук каасталгазын чыл бурунгаар кылдыңар. Ол ЮНЕСКО-нуң «Делегей чоннарының маадырлыг тураскаалдары» деп тоолдар номнарының аразынче кирген.
Тываның национал театрынга 30 ажыг чыл бурунгаар ажылдап эгелээн силер. Культура өргээзиниң столярындан эгелээш, оон кол чурукчузунга, а харын-даа директорунга чедир депшип чордуңар. Ол үениң иштинде тыва театрның, тыва уран чүүлдүң хөгжүлдезинге, сцена шимелдезинге улуг үлүг-хууңарны киирдиңер. Силерниң чогаадыкчы «холуңар үжүү» таныттынгыр» деп байырлыг чагаада бижип турар.
Депутат Шолбан Идамчапович чугаазының төнчүзүнде чурукчу, каастакчы Начын Кара-оолович Шалыкка чедиишкиннерге тура дүшпейн моон-даа соңгаар соруктуг ажылдаарын, чаа бодалдарны, чараш төлевилелдерни, а ал-бодуңарга аас-кежикти болгаш кадыкшылды күзээн.