Урянхай номчулгалар болуп эрткен
Дүүн, май 21-де, Кызылда Республиканың орус культура төвүнге «Урянхай номчулгалары» болуп эрткен.
Ону Сергей Шойгунуң тургусканы «Урянхай. Тыва дептер» деп 7 томнуг номунга үндезилеп ТР-ниң Өөредилге болгаш эртем талазы-биле яамызы организастаан. Номчулганы эртемден Кара-кыс Аракчаа удуртуп эрттирген. Ол «Урянхай. Тыва дептерни» төлевилелди боттандырган ажылчын бөлүктүң удуртукчузу турган.
Номчулганың киржикчилеринге депутат Шолбан Кыргыс ТР-ниң Дээди Хуралының (парламентизиниң) Даргазы Кан-оол Давааның даалгазы-биле байыр чедирген.
«Урянхай дептер» – Тываның узун төөгүзүнде ооң эрткен маадырлыг делгем оруун өске чурттуң хамаатылары – орус шинчилекчилерниң караа-биле чыып бижээн ажылдарны чаңгыс черге чыып тургускан баштайгы улуг ажыл болур. Ол биске алдын үнелиг. Төрээн чериниң шинчилекчилеринге, эртемденнерге, студентилерге, аныяк өскенге дептерниң ужур-дузазы улуг. Эрги шинчилел ажылдарны чаңгыс черде чыып каан болгаш, бир түү номнар-биле ажылдаарга эптиг.
Дептерниң баштайгы арыннарын ажыдыптарга, ооң маңган ак амаларында парлаан ажылдар, эрги чурук-хөөрүктер кижини салбайн баар. Ол ажылдар онза сорунза күштүг. Шын сеткилинден ажыт-чажыт чок бижээн демдеглелдер бисти эрги шагже эргилдирип, ол үелерден салбайн, дыңзыды куспактап алырын Урянхай дептерни номчуп, ажыглап турган улус билир» деп Дээди Хуралдың байыр чедирген чагаазында бижээн.
Шолбан Кыргыс бодунуң чугаазын доозуп тургаш, урянхай номчулгазының киржикчилерге чедиишкиннерни күзээн. Аңаа янзы-бүрү солун шинчилел ажылдары-биле Тываның күрүне университединиң, ортумак тускай өөредилге черлериниң болгаш хоорай школаларының үстүкү класстарының өореникчилери киришкен.