Шагаа байырлалы-биле!
Тыва Республиканың Дээди Хуралының (парламентизиниң) Даргазы Кан-оол Давааның Шагаа-биле байыр чедириишкини.
Хүндүлүг тыва чонум! Тыва Республиканың Дээди Хуралының (парламентизиниң) мурнундан онза чараш Шагаа байырлалы-биле силерге изиг байырымны чедирерин чөпшээреп көрүңер!
Тыва чон шаандан тура көк дээрге чүдүп, ай-хүн, сылдыстарны номчуп, оларның дузазы-биле үе-шакты-даа, орук-чириктиң уг-шиин-даа тодарадып ап чорааннар. Ынчангаш ай саннаашкынының чуруму-биле Шагааны уткуп, чыл солчулгазын демдеглеп чоруурувуска аажок өөрүп, сеткилим ханып турар.
Чаңчылывыс езугаар саңывыс салып, аъш-чемивис дээжизин өргүп тургаш, ак демир олуттуг Күске чылын ыры-шоорлуг, оюн-тоглаалыг уткуп аалы. Чараш тыва езу-чаңчылдарывысты моон-даа соңгаар эки сагып, бот-боттарывыска, аалчыларывыска хүндүткеливисти кезээде бедик деңнелге көргүзүп чоруулуңар.
Үнүп орар Күске чылында чуртувустуң сүүр сыннары дег бедик хей-аътты, тайгаларының баштарында меңги харлар дег ак орукту, чаа чылда төрүттүнүп турар ажы-төлүвүстүң, мал-маганывыстың баштайгы эмген аа сүдү дег арыг чаагай сеткилди, төнчү чок бадып чыдар Улуг-Хемивис дег ууттунмас олча-омакты, чалым-хаяларывыс дег быжыг кадыкшылды, аржааннарывыс дег төнчү чок аас-кежикти йөрээп тур мен.
Тыва Республиканың Дээди Хуралының (парламентизиниң) Даргазы Кан-оол Даваа.