Чаан мөгениң хүреш клуву ажыттынар
Бөгүн, март 20-де, Тыва Республиканың Дээди Хуралының (парламентизиниң) Даргазы, “Чаңгыс демниг Россия” партиязының Тыва Республикада регионалдыг салбырының секретары Кан-оол Тимурович Даваа, “Чаңгыс демниг Россия” партиязының Даргазы Д. Медведевтиң Тыва Республикада чон хүлээп алыр чериниң удуртукчузу Өнер Хүлерович Ондар Тыва Республиканың Чаан мөгези Эрес Кара-Салдың Кызылдың № 9 школазында кылып турары “Алдар” аттыг болур хүреш клувунга чедип, оларның-биле ажылчын ужуражылганы кылганнар.
Өзүп орар чаш ажы-төлдү спортче хаара тудары-биле ажыглалга кирбейн турган дыка улуг хемчээлдиг оран-саваны бодунуң күжү-биле септеп турарын Тыва Республиканың Чаан мөгези Эрес Кара-Сал келген аалчыларынга көргүзүп, салган сорулгаларын илередип, апрель айда ажыдыышкынын кылырын дыңнаткан.
Тыва Республиканың Дээди Хуралының (парламентизиниң) Даргазы Кан-оол Тимурович Чаан мөгениң күзел-соруунга катчып, арга-сүмезин кадып, боду ышкаш республиканың адын камгалаар хөй-хөй мөгелерни кижизидип өстүрерин күзээш, бүгү талазы-биле дузалажып деткиирин илереткен.