Алдын-кыс Конгар кыштагларны эргип көрген
Эрткен неделяда Тыва Республиканың Дээди Хуралының (парламентизиниң) Энергетика, тудуг, транспорт болгаш чуртталга-коммунал ажыл-агыйының талазы-биле комитединиң даргазы Алдын-кыс Темир-ооловна Конгар Барыын-Хемчик кожууннуң удуртукчулары-биле болгаш ук кожууннуң эмчилери, мал эмчилери, пенсия фондузунуң ажылдакчылары-биле кады Барыын-Хемчик кожууннуң Аянгаты, Эрги-Барлык сумуларының малчыннарының кыштагларынче ажылчын үнүүшкүннерни чоруткан.
Малчын бүрүзүнүң кыштаанга барып чедип, оларның-биле ужуражып, Шагаа байырлалы-биле чолукшулга езулал кылып, чымыштыг ажылында кандыг бергедежииннер барын үлежип чугаалажып көргеннер.
Малчыннар боттарының кызымак чоруу-биле мал-маганын онча-менди өстүрүп турарын чугаалап, келген аалчыларындан ажы-төлдүң өөредилгезинге, пенсияга болгаш өске-даа айтырыгларга хамаарыштыр арга-сүмелерин ап турганнар.
Кайы-даа суурларның малчыннарының чаңгыс-ла бергежип турар чүүлү – кокайлар бооп турар. Чырык хүндүс безин аал чоогунга четкилеп келгилээр таварылгалар тургулаар, аалдарның ыт-кужун, хойларын бо-ла туткулапкан болур. Кокайларны сүрерге мээстерге алыспас, хоран ажыглаарын база хоруп каан бооп турар.
Алдын-кыс Темир-ооловна малчын бүрүзүнче улуг кичээнгейин салып, оларның салган айтырыгларынга чедингир харыыларны берип, республика деңнелинге шиитпирлээр хире дилеглерин демдеглеп ап, моон-даа соңгаар ажыл-ижинге чедиишкиннерни күзээн.