Тывага Шагаа байырлалының улуг хүрежи болуп эрткен
«Сүбедей» өргээзинге Шагаа байырлалынга тураскааткан тыва хүреш маргылдаазы болуп эрткен. Маргылдааның хүндүлүг аалчызы болуп Тыва Республиканың Дээди Хуралының (парламентизиниң) Даргазы Кан-оол Даваа база четкен. Ол мөгелерге болгаш көрүкчүлерге Тываның Баштыңы Владислав Ховалыгның, Дээди Хуралдың депутаттарының өмүнээзинден үнүп орар Улу чылы-биле байыр чедирген.
Бо чылгы Шагаа байырлалының хемчеглери, буян-кежиктиг мөргүл номнары тускай шериг операцияда киржип турар чаңгыс чер чурттугларывыстың кадыкшылынга, онча-менди чоруунга, тиилелгелиг чанып кээринге тураскаатканын ол демдеглээн.
«Бистер маадырларывыска чоргаарланыр бис. Хамык сагыш-сеткиливис оларның-биле кады. Ынчангаш бɵгүнгү улуг хүрешти база Тываның дайынчыларынга чүгле экини күзевишаан ажыдып тур бис» – деп, Кан-оол Даваа чугаалаан.
Салыгларның түңнелинде мөгелерниң аразындан шыырактары илереттинген. Тываның Арзылаң мөгези Айдын Монгуш шүгген. Үжүүрде Чаан мөгевис Сайын-Белек Тюлюш, а үшкү-дөрткү черлерде Арзылаң мөгелеривис Монге-Эртине Куулар биле Сылдыс Монгуш болганнар.