Кан-оол Даваа республиканың көдээ ишчилеринге Наадым-2023-биле байыр чедирген
Хүндүлүг чаңгыс чер чурттугларым болгаш республиканың аалчылары!
Малчыннарның ээлчеглиг Наадымын бөгүн республикада байырлап эгелээн. Бо чараш, бурунгу байырлал-биле ажыл-ишке дадыккан хойжуларывыска, инекчилерге, сарлыкчыларга, чылгычыларга, ивижилерге болгаш тевежилерге Дээди Хуралдың депутаттарының өмүнээзинден байыр чедирерин чөпшээреп көрүнер!
Бо чылгы Наадымны көдээ ишчилер хей-аъды бедик, сеткил-сагыжы көдүрлүүшкүннүг уткуп турар. Бо найыр мал ажылдыг улустуң болза-даа, ону дөмей-ле Тываның бүгү чурттакчылары калбаа-биле демдеглээри чаңчыл апарган. Шынап-ла, тыва амыдыралывыстың үндезининге болгаш овур-хевиринге, чаңчылдарывыска хандыкшылывыс мөңге артар.
Мал ажыл-агыйы – республиканың экономиказының кол адыры, үндезини болуп турар. Тыва Республиканың эрге-чагырга органнары мал ажылын хөгжүдер дээш хүн бүрү ажылдап, мал азырап азы ону өстүрер сорулгалыг өг-бүлелерни доктаамал деткип турар. Түңнелинде каш янзы малывыстың баш саны чылдан чылче өзүп турары өөрүнчүг.
Хүндүлүг чуртташтарым болгаш республиканың аалчылары, байырлалдар-биле! Силерге тайбың көк дээрни, быжыг кадыкшылды болгаш тодуг-догаа амыдыралды күзеп тур бис. Мал-маганыңар мандып-өзүп чорзун, сагган сүдүңер савазырап чыдар болзун!
Дорогие земляки, Верховный Хурал поздравляет Вас с большим праздником, прекрасным Наадымом, и желает всем – славным чабанам, жителям и гостям республики, счастья, здоровья и мирного неба над головой!