Депутаттар А. Донгак биле С-О. Кара-Сал тергиин өөредилгелиг көдээ школачыларга байыр чедирген
Чаа чыл бүдүүзүнде, декабрь 30-де, Суг-Аксы суурнуң төп Культура бажыңынга Сүт-Хөл кожууннуң школаларының тергиин база эки өөредилгелиг уруглар, оолдарынга кожууннуң баштыңы – Төлээлекчилер хуралының даргазы Юрий Монгушевич Бызытпааның Чаа чыл ёлказы болуп эрткен.
Эки өөредилгелиг уругларның чамдыктары республика болгаш кожуун чергелиг школачы олимпиадаларның тиилекчилери база киржикчилери болган. Олар школаларның хөй-ниити ажылдарының идепкейлиг база киржикчилери.
Чараш ёлка байырлалынга Тыва Республиканың Дээди Хуралының депутаттары Александра Хаяевна Донгак биле Седен-Очур Павлович Кара-Сал база киришкен. Депутаттар эки өөредилгелиг оолдар-уругларга чигирзиг белектерни сөңнеп, чылыг-чымчак күзээшкиннерлиг байыр чедириишкинин кылганнар.
Шивини долгандыр оюннар үезинде тывыскан чаагай белектерни алган өөреникчилер тыва парламентиниң депутаттарынга, Сүт-Хөл кожууннуң баштыңынга өөрүп четтиргенин илереткеннер.
Дээди Хуралдың депутады А.Х. Донгак Сүт-Хөл кожууннуң хоочуннарының Чаа чыл ёлказынга база киришкеш, белек-селектерни сунуп, соңгукчулары-биле мага хандыр ойнап хөглээн.