Тыва парламентиниң депутаттары болгаш ажылдакчылары тыва дылга диктант бижээш, бирги Шуулганга киришкен
Бөгүн Тыва Республиканың Дээди Хуралының (парламентизиниң) Даргазы Кан-оол Даваа баштаан бөлүк депутаттар тыва дылга тураскааткан бирги республика Шуулганынга киришкен. Аңаа зал долдур чыылганнарга тыва парламентиниң Даргазы байыр чедиргеш, тыва дылды камгалап-кадагалаарының дугайында даңгыракты чыылганнар-биле хүлээп алган.
Дүүн республика девискээринге өоредилге-кижизидилгелиг «Төөгүвүстү, дылывысты, чуртувусту өөрениили» деп шимчээшкинниң иштинге тыва дылга диктант бижилгези эрткен. Ону бөгүн демдеглеп турар Тыва дыл хүнүнге тураскааткан болгаш «Үш үне» деп тема-биле эртип турар.
Тыва дыл хүнүн тургузарын Тыва Республиканың улустуң чогаалчызы Александр Даржай саналдаан. Тыва Республиканың Баштыңы Шолбан Кара-оол Тыва дыл хүнүн бо чылдың январь айда бодунуң Чарлыы-биле чарлап тургускан.
Диктантының кол сорулгазы төрээн дылын хумагалап, Тыва Республиказының географтыг байдалын, төөгүзүн, культуразын, чоннуң ажыл-амыдыралын өөрениринге сонуургалды улгаттырары, республиканың чонунуң тыва дыл, чогаал, төөгү талазы-биле билииниң деңнелин тодарадыры болган.
Диктант бижилгезиниң ниити удуртулгазын Тыва Республиканың Өөредилге болгаш эртем яамызының күрүнениң бюджеттиг «Национал школалар хөгжүдер институду» албан чери, Тыва дыл болгаш чогаал башкыларының ассоциациязы болгаш Тыва Республиканың Аныяктар Хуралы (парламентизи) боттарынга алган.
Бо чылын Тыва дыл хүнүн республикада калбаа-биле демдеглеп турары онзагай. Аңаа тураскааткан улуг Шуулган Кызыл хоорайга бөгүн бир дугаар эрткени ол. Аңаа делгереңгей илеткелди дыл эртемнериниң доктору, академик Каадыр-оол Бичелдей кылган.
Тыва дылга диктант бижилгезин организастаарынга чүгле тыва дыл шинчилекчилери, башкылары эвес, ажыл-агыйжы организациялар база киржип турар. Эң солун чүве – тыва дылга диктант бижилгезинге организацияларның ажылдакчыларының идепкейлиг киришкени болур.
Тыва Республиканың Дээди Хуралының (парламентизиниң) депутаттары, Аппарадының ажылдакчылары, «Чаңгыс демниг Россия» партияның Тывада регион девискээриниң күүсекчи комитединиң ажылдакчылары тыва дыл диктантызынга база киришкен. Бо чылын оларның саны 15 кижи четкен, ол дээрге, эрткен чылгы диктант бижилгезинге тыва парламентиден киришкен улустуң санындан каш катап хөй кижи болуп турар.
Тыва парламентиге эрткен диктантының түңнелдерин үндүрген соонда, Дээди Хуралдың депутаттары Ульяна Монгуш, Олег Сарыглар, Сергек Шактар болгаш Аппарат ажылдакчызы Амир Орус-оол олар дес-дараалаштыр тиилекчилер болган.