Депутат Эрес Хуурак Шагаан-Арыгда хүрээ тудуунуң дугайында
Эрес Хуурак, Дээди Хуралдың депутады:
Дүүн, июнь 10-да, ТР-ниң Баштыңының хүлээлгезин күүседип турар Владислав Ховалыг Улуг-Хем кожуунга ажылдап чорааш, Шагаан-Арыг хоорайда хүрээ тудуунуң ажылы-биле танышкаш барды.
Ында ажылдап турар улуска, биске, алдар-хүндүткел болду.
Мээң удуртулгам-биле тудугда ажылдап турар оолдар Дарганы эки уткуп алгаш, ажыл-агыйжы чугааны кылдывыс. Амгы үеде хүрээ оран-савазының даштын малгаштап, чугайлап доозуп тур бис. Оон иштики шеверлел ажылдарже кириптер бис.
Тудугнуң хемчээли 1600 дөрбелчин метр. Чоннуң хүрээге эки тура-биле материалдыг дузазы үзүлбес болза, хүрээни бо чылдың сентябрь 1-де байырлыг байдалда ажыглалга киирерин шиитпирлеп турар бис.
Буянныг ажылды чорударынга Дээди Хуралдың депутаттары эш-өөрүм улуг дузаны көргүзүп турлар. Оларга база өөрүп четтиргеним илередип тур мен.
Чаа Бурган өргээзи эрткен-дүшкен, үнген-кирген хамык чонунга удавас айыстыг буянын чедирер дээрзинде чигзиниг менде чок.