Тыва дыл хүнү-биле!
Хүндүлүг чаңгыс чер-чурттугларым!
Тыва Республиканың Дээди Хуралының (парламентизиниң) мурнундан силер бүгүдеге Тыва дыл хүнү-биле байыр чедирерин чөпшээреп көрүңер!
Дыл – чоннуң бот-тускайлаң, онзагай чоруунуң үндезини, кол демдээ болгаш сагыш-сеткилиниң илередикчизи. Бистиң төрээн дылывыс ниити түрк уктуг болза-даа, чүс-чүс чылдар дургузунда кожа-хелбээ чурттап чоруурувус орус, моол чоннарның дылдарындан база хөй сөстерни үлегерлеп алгаш, өскелерге дөмейлешпес чараш дылды хевирлеп тургускан.
Тыва улус үе-дүптен бээр байлак культуралыг, онзагай төөгүлүг, чечен-мерген дылдыг. Өгбелеривис дылының дузазы-биле бодунуң салгалдарын эки мөзү-бүдүштүг, төрээн черинге болгаш чонунга бердинген төлептиг кижилер кылдыр кижизидип чораан. Ол дээрге чүс-чүс чылдар дургузунда хынаттынган күш-түр. Дылывыстың сөскүрүн, чаражын, байлаан чүгле ону хүн бүрүде ажыглап чоруур кижи билир.
Төрээн дылывыска баштайгы алфавиттерни тус-тузунда бижип тургускан лама-башкы Лопсан-Чимит Монгушка болгаш профессор Александр Адольфович Пальмбахка өөрүп четтиргенивисти илередип чоруур бис. Тыва дылдың шинчилекчилери, камгалакчылары болгаш нептередикчилери Шулуу Чыргал-оолович Сатты, Доруг-оол Алдын-оолович Монгушту, Борис Исакович Татаринцевти дээш, өскелерни-даа тыва чон утпайн, чылыы-биле сактып чоруур.
Амгы үеде республиканың күрүне эрге-чагырга черлеринде ажыл-агый чорудулгазы ийи дылда чоруп турар. Дээди Хуралдың (парламентиниң) документилерин тыва дылче очулдурары чурумчаан. Ол дээрге, тыва дылды камгалап арттырарының, а харын-даа улам сайзырадырының хемчеглериниң бирээзи болур.
Төрээн дылывысты үнелеп, ону үргүлчү ажыглап, аныяк салгалдарга байлак хевээр дамчыдып бээрин кижи бүрүзү бодунуң дорт хүлээлгези кылдыр көрүп, ону сайзырадыры-биле тодаргай базымнарны кылып чорууруңарны күзедим. Бо чараш национал каттыжылга – Тыва дыл хүнү-биле өг-бүлеңерге аас-кежикти, ажыл-агыйыңарга чедиишкиннерни күзеп тур мен!
Тыва дыл – мөңге чорзун!
Тыва дыл – делгерезин!
Хүндүткел-биле,
Тыва Республиканың Дээди Хуралының (парламентизиниң) Даргазы К. Даваа