Хомду дайынының база бир киржикчизинге тураскаалды тургускан
Дүүн, октябрь 10-да, Кызыл хоорайда Хомду дайынының киржикчилериниң шөлүнге база бир арат маадырның хөрек тураскаалын тургускан. Бо удаа Хертек Балзаң оглу Наадын-Хөөге ажыткан.
Байырлыг ёзулалга Тыва Республиканың Дээди Хуралының депутады Ульчна Байыр-ооловна Монгуш киришкеш, парламент Даргазы Кан-оол Тимурович Давааның байыр чедирген чагаазын дамчыдып, номчаан. Ында мындыг сөстер бар: «Хомду дайыны – Тываның төөгүзүнде онза черни ээлеп турар. Кыдат дарлалдың кинчи-бегин үзе шапкан ол тулчуушкунга Таңды-Тываның тос кожуунунуң араттары моол араттар-биле демнежип алгаш, эң идепкейлиг киришкен. Ол дайын-чаага дидими-биле киришкен кижилерниң бирээзи Хертек Балзаң оглу Наадын-Хөө. Тиилелге соонда чуртунче сүлдези бедик чанып келген маадырларывыстың бирээзи ол.
Бистер Хомду дайынының маадырларынга Манчжур-Кыдаттан хосталга дээш өөрүп четтиргенивис илередип чоруур бис. Оларның үлегери, хей-аъды феодалдыг езу-чурумну үзе шаварынга дөмек болган. Тыва Арат Республиканы тургузуп, ону үндезилээн улустарның аразында Хомду дайынының киржикчилери база эвээш эвес. Хертек Балзаң оглу ТАР үезинде төрээн черинге чаа амыдыралды тургузарынга улуг үлүг-хуузун киирип чораан».
Амгы үеде шөлде дөрт маадырның тураскаалы бар. Оларның саны чылдан чылче улам көвүдээр боор дээрзинге чыылганнар боттарының бүзүрелин ажыдыышкын ёзулалының үезинде илередип турган.