Ээлчеглиг ай хүрежи Мөңгун-Тайга кожууннуң шаңналы дээш болуп эрткен
Тыва Республиканың Дээди Хуралының (парламентизиниң) Даргазы Каң-оол Даваа Мөңгун-Тайга кожууннуң шаңналы дээш болуп эрткен ай хүрежинге хүндүлүг аалчы болуп четкен.
Каң-оол Тимурович Тыва Республиканың Чазааның Баштыңы Шолбан Валерьевич Кара-оолдуң болгаш бодунуң өмүнээзинден чыглып келген чонга, мөгелерге изиг байырын чедирип, Мөңгун-Тайга кожууннуң төлээлеринге тыва хүрешти деткип, ооң сайзыралынга үлүг-хуузун киирип чорууру дээш өөрүп четтиргенин илередип, ажыл-ижинге бедик чедиишкиннерни күзээн.
Ниитизи-биле хүреш маргылдаазы бедик деңнелге эрткен. Хүрештиң баштайгы кезээнде 85 килограммга чедир деңзилиг мөгелерге Барыын-Хемчиктен Күжүгет Шалбачы биле Чаа-Хөл кожуундан Даржаа Айдың үшкү-дөрткү черлерни ээлээн. Тыва Республиканың Начын мөгези Одай Алдын-Сай шүүлген, Улуг-Хемниң аныяк мөгези Самдан Бады-Маадыр үжүүр былаашкан.
Мөңгун-Тайга кожууннуң шаңналы дээш болуп эрткен ай хурежиниң тулган тиилекчизин илередир ачыр-дачыр сегиржип алыышкыннарның түңнелинде Тыва Республиканың Начын мөгези Монгуш Айдың Барыын-Хемчик кожууннуң төлээзи Хомушку Начынны октааш, шүглүп үнген. Үшкү-дөрткү черлерни Тыва Республиканың Чаан мөгези Түлүш Сайын-Белек база Сүт-Хөлден Ооржак Начын-Мерген үлешкеннер.