Тыва Республиканың Начын мөгези Айдың Монгуш шүүлген
Бөгүн, август 15-те, Тыва Республиканың Дээди Хуралының (парламентизиниң) Даргазы Кан-оол Тимурович Даваа Тыва Республиканың хүнүнге тураскааткан Тыва Республиканың Чазааның Баштыңының шаңналы дээш болуп эрткен тыва хүреш маргылдаазынга чедип, Тыва Республиканың Баштыңы Шолбан Валерьевич Кара-оолдуң мурнундан болгаш бодунуң өмүнээзинден чыглып келген чонга, аалчыларга болгаш мөгелерге Тыва Республиканың байырлалы-биле изиг байырны чедирип, ажыл-ижинге чедиишкиннерни болгаш өг-бүлелеринге долу аас-кежикти, өөрүшкүнү, демниг болурун күзээн.
70 ажыг мөгениң хүрежиниң түңнелинде Тыва Республиканың Начын мөгези Айдың Монгуш Тыва Республиканың Чаан мөгези Эрес Кара-Салды октааш, шүглүп үнген. Тыва Республиканың Чаан мөгези Сайын-Белек Түлүш биле Чөөн-Хемчик кожууннуң Чаан мөгези Сергелең Ондар үшкү-дөрткү черлерни алганнар.