Иштики херектер органнарының хоочуннарынга депутаттар байырын чедиргеннер
Тыва Республиканың Дээди Хуралының (парламентизиниң) Айыыл чок чорук, корум-чурум болгаш кызыгаар чоогунуң айтырыгларының талазы-биле комитединиң даргазы Виталий Монгушевич Бартына-Сады Тыва Республиканың Иштики херектер органнарының хоочуннарының следунуң байырлыг ажыдыышкынынга киржип, Тыва Республиканың Дээди Хуралының Даргазы Кан-оол Тимуровичиниң мурнундан изиг байырын чедирип, хоочуннарның республиканың хөгжүлдезинге киирип чоруур үлүг-хуузун демдеглээн.
Алтай крайдан, Хакассия, Саха республикалардан болгаш Моолдан следка киржип келген хоочуннарга база өөрүп четтиргенин илередип, оларның удуртукчуларынга Тыва Республика-биле сырый харылзааны тудуп, демниг ажылды кылып чорууру дээш Дээди Хуралдың Өөрүп четтириишкин бижиктерин тывыскан.
Тыва Республиканың Дээди Хуралының депутады, Тыва Республиканың Иштики херектер органнарының хоочуннар эвилелиниң даргазы Марат-оол Идамович Ондар база келген аалчыларга болгаш бүгү хоочуннарга идепкейлиг чоруу дээш өөрүп четтиргенин илередип, бо чылын следта ниитизи-биле 27 команда келгенин улуг өөрүшкү-биле демдеглеп, моон-даа соңгаар бо след улам хөгжүүр, командалар моон-даа көвүдээр дээрзинге бүзүрелин илередип, оюн-тоглаага идепкейлиг киржиринче бүгү хоочуннарны чалап, кижи бүрүзүнге эки дыштанып алырын күзээн.