Өнер Ондар Чаа-Хөл кожуунга чораан
Бөгүн, май 23-те, Тыва Республиканың Дээди Хуралының (парламентизиниң) Аппарадының удуртукчузу, “Чаңгыс демниг Россия” партияның Даргазы Д. Медведевтиң Тыва Республикада чон хүлээп алыр чериниң удуртукчузу Өнер Хүлерович Ондар Чаа-хөл кожуунче ажылчын үнүүшкүннү кылган.
Чаа-Хөл кожууннуң эмнелге ажылдакчылары-биле ужуражылганы кылып, оларның ажыл-ижинде болгаш хууда амыдырында тургустунуп турар айтырыгларны чугаалажып көрген.
Чаа-Хөл сумузунда эмнелге бажыңы бичии болганындан, ажылга арай эпчок байдалдарны тургузуп турарын дыңнатканнар. Хензиг өрээлге ийи-үш эмчи улус хүлээр ужурга таваржып турар. Ынчангаш оода бичии уруглар хүлээп алыр аңгы эмнелге бажыңын сумуга тудуп бээр аргазын өөренип көөрүн дилээннер.
Ужуражылга соонда Өнер Хүлерович Чаа-Хөл ортумак школазында болуп эрттип турар сөөлгү коңга байырлалынга база чедип, доозукчуларга шылгалдаларын эки дужаап алырын күзеп, оларны эртем-билигниң эргининге чедирген буянныг башкыларга болгаш школаның бүгү ажылдакчыларынга өөрүп четтиргенин илередип, Тыва Республиканың Дээди Хуралының Хүндүлүг бижиктерин база тывыскылаан.