Кан-оол Даваа «АГИТПОЕЗД» төлевилелиниң хемчеглеринге киришкен
Бөгүн, май 18-те, Тыва Республиканың Дээди Хуралының (парламентизиниң) Даргазы, "Чаңгыс демниг Россия" партияның Тыва Республикада регионалдыг салбырының секретары Кан-оол Тимурович Даваа “Чаңгыс демниг Россия” партияның «АГИТПОЕЗД» төлевилели-биле Улуг-Хем болгаш Кызыл кожууннарга ажык чугаа хевиринге эрттирген чон-биле ужуражылгаларынга киришкен.
Чыглып келген чонга Кан-оол Тимурович төрээн чуртунуң, чурттап чоруур кожуунунуң келир үези дээш сагыш-човап, партияның хемчеглеринге идепкейлиг киржип чорууру дээш өөрүп четтиргенин илереткеш, Тыва Республиканың Дээди Хуралының депутадынче “Чаңгыс демниг Россия” партияның кандидаттарын соңгукчуларга таныштырып, кожууннарның амгы үеде байдалдарын билип алыры-биле чон-биле ажык чугааны чоруткан.
Хүндүлүг чаңгыс чер-чурттугларым!
Бо хүннерде «Чаңгыс демниг Россия» партияның эгелекчи саналы-биле мындыг хевирлиг ужуражылгалар кожуун бүрүзүнде эрттип турар. Бо эрткен үеде чуртувустуң сайзыралынга кандыг базымнарны кылып шыдаан-дыр бис, мурнувуста кандыг ажылдар кылыры артканыл? Кандыг берге айтырыглар чонувустуң сагыш-сеткилин доюлдуруп турарыл, кандыг төлевилелдерни боттандырары чугула апарган дээрзин чон-биле чугаалажып тургаш, билип алыры-биле шак мындыг ужуражылгаларны эрттирип турарывыс ол. Бистиң кол сорулгавыс – ажыл-чорудулгавыстың тодаргай түңнелдерин чугаалап, чурттакчы чоннуң бодалдарын дыңнап, билип алгаш, кожуун бүрүзүн улаштыр сайзырадыр программаже саналдап киирер бис.
2019 чылдың май айның 26-да бүгү Тывага «Чаңгыс демниг Россия» партияның баш бурунгаар бадылаашкыны болуп эртер.
Баш бурунгаар бадылаашкын дээрге чүл ол дээрзин дугайында каш сөстен чугаалап бээрин чөпшээреп көрүңер.
2019 чылдың Сентябрь 8-те бүгү Тывага Дээди Хуралывыстың депутатарының соңгулдалары болуп эртер. Ук соңгулдаларга тиилеп каан кордакчылар силерниң эрге-ажыктарыңарны Дээди Хуралга камгалаар төлээлериңер болур.
«Чаңгыс демниг Россияның» кандидат бүрүзү мындыг янзылыг «Чоннуң шүүрүнден» эртер ужурлуг. Шүүрелдени чүгле чедиишкинниг эрткен кордакчы Дээди Хуралдың депутады болур. Ынчангаш 2019 чылдың Май 26-да соңгулда участоктарынче келгеш, баш бурунгаар соңгулдада «Чаңгыс демниг Россия» партиядан кандидадыңарны шилип ап, ооң ниити байдалы-биле баш удур таныжып алыр аргалыг боор силер.
Чуртувуста кайгамчык улуг хемчээлдиг националдыг төлевилелдер боттанып турар. Аңаа чергелештир Республикавыста Чазак Баштыңының болгаш партиявыстың төлевилелдери база боттанып турарлар. Ук ажыл-чорудулганың үре-түңнелдери хоорай, кожуун, суму бүрүзүнде көстүп турары чигзиниг чок.
Мындыг хевирлиг ажыл-чорудулгада чурттакчы чонувус боду хөгжүлдениң кол уг-шиин болгаш оларның үре-түңүн тодарадыр ужурлуг. Бирги ээлчегде чүлер кылыры негеттинип турарын, ынаар кандыг, кайы-хире күжениг үндүрерин айтыр ужурлуг. Ылаңгыя чаагайжыдылга болгаш амыдыралга таарымчалыг хүрээлең тургузары, хостуг шакты организастаары, ЖКХ хандырылгазының шынары, чурттаар бажың-балгат байдалы, аргыжарының оруктары, өөредилгениң база кадык-камгалалының шынары-биле дорт холбаалыг айтырыгларда чурттакчы чоннуң санал-оналы чугула черни алыр ужурлуг.
Хүндүлүг чаңгыс чер чурттугларывыс! Аравыста чүве тоовас кижилер чок дээрзинге бүзүрээр бис. Ынчангаш туруп келгеш сөс алырын, азы тускай хуудуска санал-оналыңарны бижиирин дилеп тур бис. Санал-оналдарыңарның шуптузун чыггаш, чаңгыс аайлыг документи кылдыр «Тываның ат-алдары дээш!» деп улусчу программаже киирип каар бис. Ук программа «Чаңгыс демниг Россия» партияның холдан салбас ному болбушаан, ажыл-чорудулгаже удуртулга болур.
Хүндүлүг чаңгыс чер-чурттугларывыс! Социалдыг болгаш экономиктиг ажылдар, төлевилелдерни боттандырып тургаш, каас-чараш төрээн чуртувусту утпас ужурлуг бис. Чурттап чоруур черивис дыка чараш, эң ховар болгаш онзагай бүдүштүг агаар-бойдустуг, үе-дүпте тывылган культуравыс байлак. Кол чогаадыкчы күжүвүс төрээн черивиске ынакшылывыстан, төрээн чуртувуска чоргааралывыстан, ада-өгбелеривиске болгаш бот-бодувуска хүндүткеливистен тургустунар ужурлуг.
Ынчангаш «Чаңгыс демниг Россия» партияның регионалдыг салбыры «Чурттап чор мен. Ынак мен. Чоргаарланыр мен» деп улусчу төлевилелди эгелеп турар. Бо төлевилелге база идепкейлиг киржип, Тывавыстың хоорай, суурларының чогаадыкчы таныштырылгаларын, тергиин кижилерин, ыдык болгаш онза солун черлерин дугайында чугаалап, бижип бербишаан, оларның аттарын төөгүге мөңгежидер улуг үүлеге үлүг-хууңарны киирериңерни улуу-биле дилээр-дир бис. Эң дээре төөгүлер болгаш таныштырылгалар бүгү республикага хемчээлдиг форумга делгеттинер.