Кан-оол Даваа Бии-Хем кожуунга чораан
Май 5-те Тыва Республиканың Дээди Хуралының (парламентизиниң) Даргазы Кан-оол Тимурович Даваа Бии-Хем кожуунче ажылчын үнүүшкүннү кылган.
Бии-Хем кожууннуң чагырыкчызы Орлан Александрович Монгуш, Тыва Республиканың Чазааның Бии-Хем кожуунда бүрүн эргелиг төлээзи Любомир Севээнович Лапчар болгаш кожуун чагыргазының ажылдакчылары-биле ужуражылганы кылган. Аңаа Бии-Хем кожуунда часкы тарылга ажылдарының чорудуунга хамаарыштыр болгаш өске-даа чугула айтырыгларны чугаалажып көргеннер.
Республика чергелиг 50 хардан улуг назылыг хоочуннар аразынга болган хол бөмбүүнүң маргылдаазынга база чедип, ойнакчыларга болгаш ында чыглып келген чонга Тыва Республиканың Чазааның Даргазы Шолбан Валерьевичиниң өмүнээзинден болгаш Тыва Республиканың Дээди Хуралының (парламентизиниң) мурнундан изиг байырын чедирип, дыштаныр хүннерде чонну каң кадык чорукче хаара тудуп, спорттуң сайзыралынга үлүг-хуузун киирип, ырак-черден келген ойнакчыларны чылыг-чымчак уткуп-хүлээп, аъшкарып-чемгерип, маргылдааны бедик деңнелде эрттирип турары дээш Бии-Хем кожууннуң чагыргазынга болгаш деткикчилер Орлан Александрович Монгуш, Любомир Севээнович Лапчар, Елена Николаевна Байкара, Лидия Михайловна Хөвеңмейге болгаш Алдын-оол Белекович Намчиловка өөрүп четтиргенин илереткен.
Шак ол ышкаш Бии-Хем кожууннуң хоочуннар командазының капитаны Мөңгүнек Тангыт-оолович Ховалыг база келген аалчыларга, ойнакчыларга байырын чедирип, маргылдааны эрттирген күш-культура башкыларынга өөрүп четтиргенин илередип, каң-кадык чорукту моон-даа соңгаар сагып, аныяктарны спортка эки өөредирип чоруурун чагаан.