Кан-оол Даваа тыва хүреш маргылдаазынга чораан
Апрель 27-де, Тыва Республиканың Дээди Хуралының (парламентизиниң) Даргазы Кан-оол Тимурович Даваа Өвүр кожууннуң шаңналы дээш болуп ээлчеглиг ай хүрежинге чедип, Өвүр кожууннуң төлээлеринге тыва чоннуң ынак оюну тыва хүрешти деткип, ооң сайзыралынга үлүг-хуузун киирип чорууру дээш өөрүп четтиргенин илередип, ажыл-ижинге бедик чедиишкиннерни күзээн.
Өвүр кожууннуң төлээлери кожа-хелбээ чурттап чоруур моол чон-биле тудуш харылзаазын база катап көргүзүп, удуртуп эрттирип турар маргылдаазы тыва чонга улам солун, көрүштүг болуру-биле моол мөгелерни база чалап алган болганнар. Моол мөгелерниң киржилгези-биле болган хүрешти чон улуг сонуургал-биле көргеннер.
Түңнелинде Тыва Республиканың Чаан мөгези Сайын-Белек Түлүш шүгген, Тыва Республиканың Чаан мөгези Эрес Кара-Сал үжүүр былаашкан. Аныяк шыырак мөге Мөңге-Эртине Куулар биле моол мөге Азая үшкү-дөрткү черлерни үлешкеннер.