Алдын-кыс Конгар Барыын-Хемчик чону-биле чолукшуп чораан
Тыва Республиканың Дээди Хуралының (парламентизиниң) Энергетика, тудуг, транспорт болгаш чуртталга-коммунал ажыл-агыйының талазы-биле комитединиң даргазы Алдын-кыс Темир-ооловна Конгар Шагаа байырлалында Барыын-Хемчик кожуунче үнүүшкүннү кылган.
Ак-Довурак болгаш Кызыл-Мажалыктың удуртукчулары-биле болгаш идепкейлиг ажыл-ишчи чону-биле ужуражылгаларны кылып, Шагаа байырлалы-биле суй-белектерин сунган.
Барыын-Хемчик кожууннуң шагаа байырлалы болуп эртип турган Каткылыг биле Баян-Гол деп черлеринге чедип, ук девискээрлерниң малчыннарынга база чаа үнүп келген чыл-биле изиг байырын чедирип, таалыңнарын сунуп, чолукшулга езулалдарын кылган.
Барыын-Хемчик чону оюн-тоглаазын бедик деңнелге, өөрүшкү-маңнайлыг эрттирип турарын демдеглевес аргажок болган. Алдын-кыс Конгар байырлалдың мөөрейлериниң бирээзи шыдыраага идепкейлиг киржип, чону-биле кады дыштанып алыр аргалыг-даа болган.