Ульяна Монгуш Мөңгүн-Тайга чурттакчыларынга байырын чедирген
Шагаа байырлалдарының бүдүүзүнде Тыва Республиканың Дээди Хуралының (парламентизиниң) депутады Ульяна Байыр-ооловна Монгуш Тываның эң ырак кожууннарының бирээзи Мөңгүн-Тайга кожуунга чедип, ында болуп эрттип турар байырлыг хемчеглерге киржип, кожууннуң чурттакчы чонунга Шагаа байырлалын уткуштур эң эки күзээшкиннерлиг изиг байырын чедирип, белек-селээн сунуп, чолукшулга езулалын база кылгаш келген.
Агаар-бойдус чеже-даа кадыг-берге болза, бурунгаар чүткүлдүг кызымаккай ажылдап чоруур мал ажыл-агыйлыг чонунуң сагыш-сеткилин дыңнап, оларның республиканың көдээ-ажыл-агыйының сайзыралынга киирип чоруур үлүг-хуузун демдеглевишаан, Ульяна Байыр-ооловна улуг малчыннарга үлегерлиг ижи дээш өөрүп четтиргенин илередип, аныяк малчыннарга чагыг-сүмезин берип, кижи бүрүзүнге моон-даа соңгаар Мөңгүн-Тайга дег бедик хей-аъттыг болурун күзеп, сарлык бугазы дег чывар соокту тоовас, кадыкшылдыг, Мөңгүн-Тайганың меңгилери дег быжыг туруштуг, демниг болурун йөрээп турган.