Верховный Хурал (парламент) Республики Тыва

Официальный сайт search.png   vkontakte   facebook   twitter

Алдан-Маадыр школазынга Түмен-Баир Ооржактың адын тывыскан

27 октября 2018 - 05:49

Дүүн, октябрь 26-да, Тыва Республиканың Дээди Хуралының (парламентизиниң) Аппарадының удуртукчузу Өнер Хүлерович Ондар Сүт-Хөл кожууннуң Алдан-Маадыр сумузунуң ортумак школазынга школазынга Тыва АССР-ниң алдарлыг башкызы, РСФСР-ниң улусчу өөредилгезиниң тергиини, күш-ажылдың хоочуну Түмен-Баир Арын-оолович Ооржактың чырыткылыг адын тывыскан езулалга четкеш, школаның коллективинге Дээди Хуралдың мурнундан изиг байырын чедирген.

Хоочун башкы, Алдан-Маадыр сумузунуң хүндүлүг чурттакчызы, улуг-биче чоннуң сүмелекчизи чораан Түмен-Баир Арын-ооловичиниң хөй чылдарның дургузунда ук школага ак сеткилдиг ажылдап чораанын Өнер Хүлерович үнелеп демдеглевишаан, Түмен-Баир Арын-ооловичиниң удуртуп турган чылдарында туттунган улуг школа, хоочун башкының эки ажылының балаттынмас изи болуп, амгы үеге чедир ажыглаттынып чоруурунга өөрүшкүзүн база илереткен. 

Шак ол буянныг өргээниң моон-даа соңгаар аныяк салгалдарны ак сеткилдиг ажыл-ишке кижизидип, оларның салым-чаяаннын оттуруп, эртем-билигге чедирип чоруурун күзевишаан, школаның коллективинге чедиишкиннерни, аас-кежикти йөрээгеш, белек-селээн база сунган.



Возврат к списку