Таңды кожууннуң кышка белеткели эки деп санаттынган
Бөгүн, октябрь 18-те, Тыва Республиканың Дээди Хуралының (парламентизиниң) Даргазы Кан-оол Тимурович Даваа Танды кожуунче ажылчын үнүүшкүннү кылган.
Таңды кожууннуң Бай-Хаак сумузунда спортчу төпке РСФСР-ниң алдарлыг тренери Валерий Маадыр-оолович Оюннуң адын тывыскан байырлалга Таңды кожууннуң чурттакчы чонунга Тыва Республиканың Баштыңы Шолбан Валерьевичиниң болгаш Дээди Хуралдың мурнундан изиг байырны чедирген.
Кан-оол Тимуровичиниң байыр чедириишкини Крымның өөредилге черинге болган хайлыг болуушкунга кажыыдалын илергейлээн, шыпшыңның минутазы-биле эгелээн.
Спортчу клубтуң директору, Паралимпий оюннарынын чемпиону Михаил Кара-оолович Оюнга болгаш бүгү тренер башкыларга бедик чедиишкиннерлиг ажылды күзээш, хүндүлүг аалчылар болуп байырлалда келген хоочун спортчуларга аныяк салгалга үлегерин көргүзүп, деткимчезин база үргүлчү чедирип чорууру дээш өөрүп четтиргенин илередип, моон-даа соңгаар Таңдыдан шыырак спортчулар өзүп үнүп, чуртувусту делегейге алдаржытсын деп йөрээген.
Ук байырлалга тураскааткан республика чергелиг элээди оолдар аразынга хостуг хүреш маргылдаазының ажыдыышкынынга Тыва Республиканың Дээди Хуралының (парламентизиниң) Аграр политиказы, чер, өнчү хамаарылгалары болгаш экология талазы-биле комитединиң даргазы, Тыва Республиканың хостуг хүреш федерациязының даргазы, Тыва Республиканың Арзылаң мөгези Радислав Николаевич Наважап база байыр чедириишкинин кылып, Валерий Маадыр-ооловичиниң дугайында чырык сактыышкынны чугаалааш, маргылдаада киржип келген спортчуларга бедик чедиишкиннерни күзээн.
Байырлал соонда Кан-оол Тимурович Таңды кожууннуң чагырга даргазы Алик Кертик-оолович Монгуш-биле Бай-Хаак сумузунуң социал обьектилериниң кышка белеткели-биле таныжып көрген.
Сумунуң одалга болгаш суг дамчыдар төптеринге чедип, ажылдакчылар-биле ужурашкан. Кайызында-даа кышка белеткел эки, септээр хире чүүлдерни чайын-на кылып алган, кышкы үеде херек апарып болур хире чүүлдерни база артыкка суккулап, белеткеп алган болганнар.
Ногаа аймаа шыгжаар черинге база чедип көрген. Ында байдал ам дээрезинде эки, 50 тонна хире картофельди дүжүдүн шыгжап алган болганнар.
Сосновка сумузунуң ортумак школазынга база четкен. “Чаңгыс демниг Россия” партияның “Уруглар спорту” деп төлевилели-биле септеттинген школаның спорт залының байдалдары-биле база таныжып көрген. Септелге амгы үеде бүрүнү-биле доозулган болган.