Мурнуу кожууннарда сиген белеткели уламчылап турар
Эрткен неделяның дыштаныр хүннеринде Тыва Республиканың Дээди Хуралының (парламентизиниң) Аграр политиказы, чер, өнчү хамаарылгалары болгаш экология талазы-биле комитединиң даргазы Радислав Николаевич Наважап Танды, Тес-Хем болгаш Өвүр кожууннарның сиген белеткелиниң ажыл-чорудулгазы-биле таныжып чораан.
Ылаңгыя Таңды кожууннуң Межегей сумузунуң сиген кезер бригадазы дүн-хүн чок шудургу ажылдап турар дээрзи белеткеп кылып алган сигеннеринден көскү болган. Бо чылын Бай-Тайга болгаш Мөңгүн-Тайга кожууннар-биле база дугуржулга кылып алган болгаш, сигенни шыдаар шаа-биле көвүдедир кезер дээш кызып турарын бригаданың кежигүннери келген аалчызынга илереткеннер.
Өвүр кожууннуң Дус-Даг сумузунуң малчыннары база сиген белеткелин 60 хуу чедир күүседипкен болганнар. Малчын Чимит Чымбаевич Куулар 300 дүрүг сигенни белеткеп алган. Кожуунда бирги черде, республикада ийиги черде чоруп турар болган.
Радислав Наважап Дус-Даг сумузунуң бо чылын күрүне чергелиг Начын ат күүсеткен мөгези Одай Алдын-Сайга Тыва Республиканың Дээди Хуралының (парламентизиниң) Хүндүлел бижиин болгаш ооң ада-иезинге Дээди Хуралдың Өөрүп четтириишкинин база тывыскан.