Наадым байырлалында мурнакчы малчыннарга Дээди Хуралдың шаңналдарын тывыскан
Дүүн, июль 13-те, кежээ Кызыл хоорайдан каш-ла километр черде Тос-Булакка республиканың малчыннарының Наадымының Өг хоорайжыгажының байырлыг ажыдыышкыны болуп эрткен. Ооң-биле улуг национал байырлал эгелээн деп санап болур.
Өг хоорайжыгажының ажыдыышкыны чаңчыл ёзугаар кожууннар төлээлериниң байырлыг чыскаалы-биле эгелээн. Каас-чараш кылдыр кеттинген делегациялар байырлалды аян-шинчи киирген. Кожуун бүрүзү кайы-бир чүүлге өскелерден ылгалырын кызып турары илдең болган. Чижээ, Тожу кожууннуң чыскаалынга иви малды бараалгаткан. Улуг-хемчилер республикада билдингир апарган модель агентилелиниң чараш национал хептери-биле чыскаалче үнген.
Өг хоорайның байырлыг ажыдыышкыны-биле «Эң чараш дерилгелиг өг» деп кожууннар аразында конкурс эгелээн. Ооң түңнели бөгүн, июль 14-те, илереттинер. Тиилекчи болур өглерни даарта тыва хүреш маргылдаазының үезинде байырлыг байдалга шаңнаар.
Республикада билдингир артистерниң база кожууннарның киржилгези-биле тургускан байырлыг концерт үезинде мурнакчы малчыннарга республика шаңналдарын тывыскан. Тыва Республиканың Дээди Хуралының Даргазы Кан-оол Давааның даалгазы-биле Аграр комитеттиң даргазы Радислав Наважап тыва парламентиниң Хүндүлел бижиктерин болгаш Өөрүп четтириишкин бижиктерин бөлүк малчыннарга тывыскан. Ол байыр чедирип тургаш: «Тыва чонувустуң бурун шагдан бээр ынак байырлалы – Наадымны таварыштыр Тыва Республиканың Дээди Хуралының (парламентизиниң), Кан-оол Давааның өмүнээзинден силерге изиг байыр чедирерин чөпшээреп көрүңер!
Бо чылгы Наадымны республиканың чону улуг көдүрлүүшкүннүг уткуп турар. Алыс боду мал ажылдыг улустуң байырлалы болза-даа, ону дөмей-ле Тываның бүгү чурттакчылары калбаа-биле демдеглээри чаңчыл апарган. Мал ажыл-агыйы – республиканың экономиказының кол адыры, үндезини болуп турар. Тыва Республиканың эрге-чагырга органнары мал ажылын хөгжүдер дээш хүн бүрү ажылдап, мал азырап азы ону өстүрер сорулгалыг өг-бүлелерни доктаамал деткип турар.
Чоннуң улуг деткимчезин болгаш үнелелин «Чемгерикчи инээвис», «Аныяк өг-бүлеге кыштаг» болгаш «Суур бүрүзүнге бүдүрүлге» деп губернатор төлевилелдири алган. Мал ажылын хөгжүдеринге улуг идигни берген бо төлевилелдер боттандырылгазы чазак-чагырга черлериниң деткимчези-биле моон-даа соңгаар уламчылаар. Ындыг болганда, ол биске чүгле харыысалганы онаап турар эвес, а кызымак ажылга бедик хей-аъттыг болурувусче база кыйгырып турар.
Республиканың малчыннарының Наадым байырлалын таварыштыр силер бүгүдеге кадыкшылды, аас-кежикти болгаш төрээн Тывавыстың хөгжүлдези дээш кылып чоруур бүгү-ле ажылдарыңарга чедиишкиннерни күзедим!» деп чугаалаан.