Кан-оол Даваа спортчу маргылдааларның хүндүлүг аалчызы болган
Бөгүн, январь 27-де, Тыва Республиканың Дээди Хуралының (парламентизиниң) Даргазы Кан-оол Тимурович Даваа Кызыл хоорайга болуп эрткен спортчу хемчеглерге чораан.
1994 чылдан 2003 чылга чедир Иштики херектер сайыды албан-дужаалга төлептиг ажылдап чораан, милицияның генерал-майору Сергей Сайын-Белекович Монгуштуң чырык адынга тураскааткан Тыва Республиканың содаачылар маргылдаазы “Динамо” спорт залынга болуп эрткен. Маргылдааның байырлыг ажыдыышкынынга парламентиниң Даргазы Кан-оол Тимурович маргылдааның эрттирикчилеринге өөрүп-четтиргенин илереткеш, Сергей Сайын-Белековичиниң ажылдап чораан үелеринге хамаарыштыр чырык сактыышкыннарны чугаалап тура, ооң кижизиг аажы-чаңын, биче сеткилин, дузааргак чоруун, кылып чораан ажылынга бердингенин үнелеп демдеглээн.
Ай санында болуп эртип турар ээлчеглиг хүрешти бо удаада Таңды кожуун “Херел” спорт залга эрттирген. Кан-оол Тимурович аңаа база чедип, Таңды кожууннуң төлээлери-биле ужуражып, кожуунда амгы үеде байдалдар-биле таныжар аргалыг болган. Таңды кожууннуң чагыргазының даргазының хүлээлгезин күүседип турар Алик Кертик-оолович Монгуш, Таңды кожууннуң баштыны - Төлээлекчилер хуралының даргазы Светлана Васильевна Псарева болгаш Тыва Республиканың Чазааның Баштыңының Таңды кожуунда бүрүн эргелиг төлээзи Наталья Никитична Медведева-биле чаа төлевилелдерниң күүселдези, кыштаглаашкын, одалга болгаш кыштагларже оруктарның байдалдарынга хамаарыштыр элээн айтырыгларны чугаалажып көргеннер.
Ол ышкаш кыштың дошкун соогунга чалынмайн, хүреш көрүп чедип келген чонну база деткип, хүрешти төнчүзүнге чедир көргеш, тиилекчилерге шаңналдарны тыпсырынга база киришкен.
Хүреш ниитизи-биле дыка бедик деңнелге болгаш солун байдалга эрткен. Мөгелерниң чараш хүрежи бо удаада база аарыкчыларының сеткилин өөртүп, хей-аъдын көдүрген.