В. Бартына-Сады кызыгаарда байдал-биле танышкан
Эрткен неделяда Тыва Республиканың Дээди Хуралының Эрзин кожуунга болуп эрткен хүннеринде Тыва Республиканың Дээди Хуралының (парламентизиниң) айыыл чок чорук, корум-чурум болгаш кызыгаар чоогунуң айтырыгларының талазы-биле комитединиң даргазы Виталий Монгушевич Бартына-Сады Эрзин кожуунче ажылчын үнүүшкүннү кылган.
Моол биле Тываның кызыгаар чоогунда чурттап чоруур малчыннарның ажыл-амыдыралы-биле болгаш ниитизи-биле ук кожуунда айыыл чок чорук талазы-биле чоруттунуп турар ажыл-агый-биле чоок таныжып көрген.
Кызыгааржылар болгаш малчыннарның депутатка киирген бир кол шиитпирлеп чадап турар улуг айтырыы - Тес-Хемни кежир көвүрүгнү кылдырып бээри болган. Ук хемде көвүрүг чок болганындан хемниң ол-бо талаларынче мал-маган одарлаттынмас, кызыгаар шериинге-даа арай таарымча чок байдалды тургузуп турар дээрзин илереткеннер.
Ол ышкаш кызыгаар чоогунуң девискээрлеринде сотолуг харылзаа чок бооп турар. Черле инчеш кызыгаар чоогунда чурттап чоруур улуска кандыг-даа байдалдар тургустунуп кээп болур. Ынчангаш сотолуг харылзааның маңаа эргежок чугулазын база дыңнатканнар.
Моол биле Тываның кызыгаарында хыналдалыг эрттирилге черинге база четкен. Тыва каайлы чериниң даргазы Игорь Михайлович Качеев, «Цаган-Тологой» хыналда чериниң даргазы Даина Васильевна Ламбын болгаш ол үеде аңаа хүлээлгезин эрттирип турган ажылдакчылар-биле депутат ужуражып, оларның ажыл-херээниң байдалдары-биле танышкан.
Суглаар чери 500 метр черде турарын каайлы ажылдакчылары дыңнадып, кудук турар черден тура бээр суг дамчыдылгазын кылдырар аргаларын дилээн. Ол ышкаш кызыгаар эртер кижилерниң чүъгүн хынаар рентген аппарады база үрелген. Ынчангаш кижилерниң чүъктерин боттары үжеп хынаар ужурга таваржып турар.
Ол-ла хүн В. Бартына-Сады Эрзин кожууннуң иштики херектер килдизиниң ажылдакчылары-биле база ужуражылганы кылган.
Девискээр шагдааларының ажыл-чорудулгазынга кандыг угланыышкыннар, аргалар ажыктыг, эптиг болурунуң дугайында В. Бартына-Сады тайылбыр ажылды база кылган:
- Харыылап турар девискээриңерге кем-херек үүлгедиглери болдурбазы дээрге-ле дүне оларны кадарып кылаштаары эвес-тир. Ол дээрге аныяк өскен-биле баш бурунгаар кижизидилге ажылдарын чорудары болур. Кудумчуга ыңай-бээр чычаанныг халдывайн, үргүлчү чадаг кылаштап, кезээде чон-биле ужуражып чоруңар. Хөй-ниити организациялары, чагырга чери, клуб болгаш школа ажылдакчылары-биле сырый тудуш ажылдаары чугула. Шала шимченгир тенек байдалдыг оолдарны янзы-бүрү секцияларже хаара тудар херек. Ынчан силерниң девискээриңерге кем-херектер болбас болур... – дээш, депутат бодунуң ажылдап чораан үелеринден чижектерни үлегер кылдыр база кииргилээн.